|
Nàndo a spasso par òn sentier, su la montagna, incuriosìdo, me son fermado vessin a on capitèl. Nò l’era miga fato con el coèrto che nol se bagna, ma piantà sù con legno strasso e foje verte al çiel. El mè subito piasù parchè, l’ era roba da pitochi! Se vedea che l’ era fato con material catàdo intorno... Magari laorado in pressia finchè se pascolava i ochi, o robada la mezzora del sponsin del mezogiorno. No ghèra miga case tuto intorno, a vsita d’ ocìo, ma tanta erba verde, boschi e on ciaro rusceleto. Me cucio e col fassòl in te l’ acòa limpida lo pocio, par sorarme on s’ ciantinin e farme più frescheto. Coando me alzo, me risbrissia el sgoardo al capitel! Vardo el Cristo che el par proprio che ’l me ciama. Smovo la testa on par de olte, ribagno col fassol el me servèl e me digo: - Dai, dai che l’ è stò caldo, torna da to mama ! - Ciapo el mè baston, fasso coalche passo ancora … Staolta, no sento più la voce, ma na man su la me spala! - Fermate nà s’ ciantina, dai, sta coà con mì mez’ ora! - Porca vaca! E si no mia beù, come fasso a essar in bala? La ciapo come na illusion che me vegnù dal caldo, sercaà da fischietàr, ma gavèa nà fifa che valèa par trè! Son tornà sì indrio ai piè de stò capitel bèn saldo fasendome coraio ghe digo: - Meto ciamà Ti, parchè? - - Vedito che ti te mè sentìò! - Me sento dir e mè spaento! - Dai, te gavarè mia paura del tò Signor, son mi, son Dio! - - Pian pian, te discori Ti, ma spèta un minuto che me sento fame ciapàr on pochetin de fià prima che me olta indrio! |
